منتديات احباب عرب  

العودة   منتديات احباب عرب > ^~*¤©[£]القسم الاداري[£]©¤*~^ > شروحات للمشرفين

من مقالات محمد عبدالماجد لمباراة قمة اليوم 20\10\2012

محمدعبدالماجد / وان طاااال السفر المباراة دي شفناها قبل كدا السبت 20 أكتوبر 2012 ................. مرات بتمر بي حتة ...تلقى ليك (شجرة)..وشافع واقف تحتها...يتخيل ليك كدا ..ان المشهد دا انت

إضافة رد
 
LinkBack أدوات الموضوع انواع عرض الموضوع
  #1  
قديم 10-20-2012, 02:21 PM
الصورة الرمزية حمد السوداني
حمد السوداني غير متواجد حالياً
 
تاريخ التسجيل: Dec 2011
المشاركات: 44,695
معدل تقييم المستوى: 51
حمد السوداني is on a distinguished road
موضوع منقول من مقالات محمد عبدالماجد لمباراة قمة اليوم 20\10\2012

محمدعبدالماجد / وان طاااال السفر
المباراة دي شفناها قبل كدا
السبت 20 أكتوبر 2012

.................
مرات بتمر بي حتة ...تلقى ليك (شجرة)..وشافع واقف تحتها...يتخيل ليك كدا ..ان المشهد دا انت شفتو قبل كدا.
المشهد دا ما غريب عليك.
زي كأنو بعيدوا في (اللقطة) دي.
تمشي السوق ...تطلب ليك عصير برتقال..يتهيأ ليك كدا ...ان هذا العصير البرتقالي ..شربتو قبل كدا.
بي نفس الطعم...حتى بالمرة كدا ..ح تنسي الباقي.
ورغم انك عارف انك ح تنسي (الباقي)..بتنسي الباقي ..وانت متذكر الحكاية دي.
ومرات تمشي ..تركب البص ..تقول اسافر ...تلقى ليك زول زي (التعليق السياسي) الكان بجي بعد النشرة.
يشبكك قصص وحكاوي ...تنوم وتصحي في مقعدك ..بتلقى صاحبك بحكي ...التقول (فوزي بشري).
تتخيل وانت بتسمع في الكلام دا ...انو الكلام البقول ليك فيه الزول دا ...انت (سمعتو) قبل كدا.
في حاجات بتتكرر في حياتنا.
تفتح الماسورة...تلقى الماسورة قاطعة.
قطعت الماسورة دي ...سمعتها قبل كدا.
دي حاجة بتتكرر كل يوم في حياتنا ...(زي اسماء في حياتنا).
تمشي الطابونة ...تجيب (الرغيف)..تشاكل ليك زول في الطابونة ..فجأة تتذكر ان (الشكلة) دي مرت عليك قبل كدا.
دي شنو اللخبطة دي يا جماعة؟.
في مشاهد بتتكرر في حياتنا.
ومرات كمان بتتكرر بالتصوير البطيء.
موش مرات بلاقيك زول ...يثبتك ..يقول ليك اسمع انا بتخيل لي شفتك قبل كدا.
وهو لا شافك ...ولا قابلك.
لكن (احساس) بس. بالمناسبة دي .. نص ولاد حلتنا ..بدأت قصص حبهم من (انا شفتك وين؟).
حنك قديم...كان بقسم قبل (الديجتل).
هسع مع الديجتلات دي إلا تبقى كابتن طيران.
ناس علماء النفس ..عندهم تفسيرات للحكايات دي ...هناك (تثاؤب) بحصل ..والشواهد تحكي عن هذه الوقائع.
في التاريخ الاسلامي بعض من تداعي العقل الباطني.
ما عاوزين (نثرثر) كتير في الموضوع دا من ناحية (ايدلوجية).
والله الليلة عندي (ضرس) ينتح زي خفير المستشفى.
ضرس الله لا جابو لي زول فيكم.
مع ذلك ...قلت لازم في يوم زي دا اتواصل معاكم ...اعمل شنو؟..الليلة المباراة ...وما معقول اغيب في يوم زي دا.
قلت اكتب ليكم بي (ضرسي) دا ...بس اعذروني ..عشان مرات بشوف حرف (الواو) سا سمك.
يعني شنو؟.
يعني سا سا سادومبا.
والكاف ...بشوفوا (فيفا) عديل.
الله يدينا (نوم) مع الضرس دا.
وبيني وبينكم انا ما عارف (الارق) دا ..من الضرس والا من (المباراة).
عاوز اقول ليكم حاجة عن المباراة.
المباراة دي ما تشيلوا همها ...مباراة ساهلة شديد ..وما فيها أي ضغط.
عشان كدا خلوا اعصابكم مرتاحة.
امشوا الاستاد عشان تستمتعوا.
ومن هسع بنقول لي ناس الهلال ...هيثم مصطفى حفظه الله ورعاه شيلوا ليه 4 فنائل. عشان ساني براهو ح يقطع فنايلتين.
وباسكال حيقطع اتنين.
يا ساني ...انت ما تتهجم ساكت...الحاجات دي عند (البرنس) عادية.
انت قايل هيثم مصطفى دا (سعيد السعودي) عشان تتهجم كدا.
ما تقعد تتهجم لينا كدا.
بالمناسبة يا جماعة ...انا مباريات هلال مريخ دي حفظتها ..حفظ.
بقيت ناقش ليك فيها أي حاجة.
يعني مباراة الليلة ..التى لم تلعب حتى الان ...انا زي الشفتها.
وممكن احكي ليكم التفاصيل بالحرف.
انا من البداية موش قلت ليكم ..في حاجات كدا..بتمر عليك ..بتحس بي انك شفتها.
اها مباراة اليوم التي لم تلعب الي الان ...انا زي الشفتها قبل ما تلعب.
الفيلم دا شفناها.
النكتة دي قديمة ..سمعناها قبل كدا يا شباب.
ما تقعدوا لي في (رموشكم) كدا ..زي الزول النازل في اخر محطة.
طيب عشان ما تقولوا الزول دا ..بتكلم ساكت ...انا بقول ليكم ..حاجات في المباراة ..وبعدين انتوا شوفوها ..بتحصل وإلا ما بتحصل.
بس ان شاءالله (الضرس) يديني فرصة اكمل العمود دا.
شكلوا كدا ما بخليني اتم ليكم القصة.
شوفوا مباراة الليلة ..غارزيتو ..ح يقعد (البرنس) في الكنبة.
موش الحكاية دي حفظناها نحن.
الهلال غلب في الشوط الاول ..واتقدم وهذا ما نتمناه ..هيثم بقعد في كنبتو.
حصلت حاجة كدا ..وإلا كدا ..لا قدر الله ...هيثم بدخل في الشوط الثاني.
الموضوع دا بالنسبة لينا بقى محسوم.
عشان كدا ..مفروض الجماهير تتجاوز الحتة دي.
يعني هيثم قاعد برة ..جمهور الهلال مفروض يهتف للاعبين الجوة ..هيثم خلوه.
وطول ما المباراة بديرها (غارزيتو)....يبقى خلوه يعمل الحاجة المناسبة ليه ..ما تفرضو حاجة على المدرب ..وما تهتفو لي هيثم.
بعدين نتيجة المباراة مسؤول منها غارزيتو ...ويمكن في النهاية يحاسب غارزيتو فنيا.
عليه ..مفروض جماهير الهلال ما تتوتر ..لو هيثم مصطفى لعب ..او لم يلعب ..ما تطلعوا من جو المباراة.
ركزوا مع الفريق ..وشجعوا التيم كلو.
نتجاوز الحتة (الحافظنها) دي.
بلة جابر.
بلة جابر مالو يا ود الناس.
بلة جابر في الدقيقة 15 من الشوط الاول ح ينط جوز في (كاريكا).
جوز بلة جابر بقى معروف..ومحفوظ.
ايكانغا.
ايكانغا مالو؟.
ايكانغا ماشي عليه يا جماعة.
اصبروا بس ..الشيء خطوة ..خطوة ...والضرس كعب.
الله يستر على ايكانغا من (الكرت الاحمر).
انا لو كنت في مكان غارزيتو ..كنت ابعدت ايكانغا من المباراة..اولا عشان احافظ عليه ..ثانيا عشان ناس المريخ ح يدخلوا المباراة من اجل استفزاز ايكانغا.
لذلك غارزيتو ..مفروض يبعد ايكانغا من هذه المباراة ..او على الاقل يمتص حماسه في البداية ..ويخليه في الكنبة.
الدقيقة 21 من عمر المباراة ..عمر بخيت ....بتكلم مع الحكم.
شفتوا كيف؟.
قلت ليكم المباراة دي دخلناها قبل كدا.
الدقيقة 27 الهوبة الاولى.
عارفين الهوبة الاولى من منو؟.
من ساني.
هوبة مهند الطاهر ..ماشين عليها ..بتحصل في الشوط التاني
الحضري ..بقع ..بعمل فيها عاوز يبدل (الشنكارات) ..وبعمل فيها بلبس في الجونتيات.
الحتة دي برضو بقت معروفة لينا.
الحضري عاوز يخفف الضغط الحاصل على المريخ شوية.
المريخ حتى الدقيقة 30 ان شاءالله مهزوم 1-0 من الهلال.
سادومبا.
سادومبا مالو؟.
سادومبا بجيب الهدف التاني في الدقيقة 37.
ليما بمشي اللاين ..عشان يشرب ليه موية.
ركزوا على ليما ..بتغلبوا خمسة.
الزمن الضائع 4 دقائق.
الشوط الاول بنتهى 2- 0 ان شاءالله.
شفتوا كيف؟.
في اللحظة دي ...لحظة ما بين الشوطين ..جمال الوالي بضرب تلفون ...بقول لي صديق علي صالح ..الشوط التاني دا يشرف عليه فاروق جبرة.
ريكاردو ببقي يجهز في حقيبتو.
موسي الزومة بقوم يسخن ...ح يدخل بديل ليما.
ليما بكرة ح يتبهدل ..بهدلة شديدة.
اول خمس دقائق ...كاريكا بجيب الهدف الثالث ..ان شاءالله.
جماهير المريخ تبدأ تطلع من الملعب.
والناس القاعدة تتابع في المباراة من التلفزيون ..بقفلوا التلفزيون ..وبحوموا بالعربات.
الباشا يخرج.
اصلوا يا جماعة الباشا دا في أي مباراة قمة بطلعوها
سكواها بطلع.
العجب ...بسخن ..لكن ما بدخل.
الهدف الرابع ...الهوبة التانية.
الهوبة التانية دي حقت مهند الطاهر.
صديق علي صالح ..بدخل الملعب.
المباراة بتتوقف شوية.
والهلال بقدم احلى العروض.
جماهير المريخ تطالب بي شطب سعيد السعودي وضفر وبلة جابر.
عصام الحضري ..ح يتبهدل جنس بهدلة ..ح يشوف العمرو ما شافو.
اليوم التاني ...جرايد المريخ ..ح تطلع بالعناوين المألوفة لينا.
وريكاردو ح يقيلوه ..يتولى الاشراف على الفريق فاروق جبرة.
مزمل ابوالقاسم ح يبقى مدير النادي ..ومامون ابوشيبة ..ح يقول لي ناس رمضان عجب ..لو دي كورتكم ..نحن احسن نرجع نلعب كورة برانا.
والله مامون ابوشيبة دي فيه جنس (طرف يمين).
مامون ابوشيبة بي فصاحتو دي الكورة ح يوديها السما.
وبعد ما الكورة تمشي السما ..بمسك الجمهور (مواعظ) وحكم.
اما بابكر سلك ..فهو لو قلب الهوبة كدا ..ما بنفع اكتر من حكم رابع.
بابكر سلك ...ما بنفع اكتر من انو يرفع الزمن البدل الضائع.
حاجة غير دي سلك ما بنفع فيها ...ولا بنغشوا ليكم.
تعمل فيها نور الشريف يا سلك ..محمود يس ..برضو ما بتنفع في شيء اكتر من انك ترفع الزمن البدل الضائع.
نسيت.
نسيت شنو تاني.
نزار حامد (الصاقعة) يمكن بكرة يجيب ليه هدف ...الحكم ما يحسبو
ملحوظة : الحمدلله الضرس ..انستر ..لكن الظاهر احمد الحاج ما ح ينتسر..تلفوناتو كترت.
هوامش
جماهير الهلال مطلوب منها تشجع.
جمهور الهلال مفروض ما يركز كتير مع غارزيتو.
انتوا شجعوا لي اخر نفس ..وشوفوا بعدين البحصل شنو؟.
اصلو نحن أي حاجة عندنا بي نظام.
التحكيم الافريقي ان شاءالله سوف يكون عادلا.
واحتمال المباراة يكون فيها ضربة جزاء.
الهلال لو لعب بالصف التاني ..بكون برضو طلع من الضغوط.
نتمنى ان يبقى سجل الهلال في هذا الموسم خاليا من الخسارة.
وهذا شيء يمكن المحافظة عليه بواسطة الجماهير.
على الجماهير ان تساند الهلال ..وان تشجعه لي اخر ثانية من عمر المبارة.
في اخر مباراة قمة الهلال ادرك التعادل في اخر 5 دقائق.
لذلك ينبغي ان تشجعوا الهلال في كل اوقات المباراة.
الهلال يمتلك هجوم ..قادر على ان يحول نتيجة المباراة في أي لحظة.
ما عندنا أي مشكلة.
هجوم الهلال دا لو الهلال مغلوب عشرة ..قادر على ان يعدل النتيجة.
انتوا بس شجعوا.
أي زول هلالابي الليلة مفروض يدخل المباراة ..عشان يستمتع.
في واحد قال معتز رابح ح يجيب ليه قون.
قلت ليه معتز رابح في القضارف ..ح يجيب ليه قون كيف في مباراة ما مشارك فيها.
صاحبكم قال لي والله مع دفاع المريخ دا ..معتز رابح لو طرف ليه في كورة في ديم النور ..بجيب ليه قون في الحضري.
بعدين يا جماعة الحضري كبر.
الحضري سبعة وخمسة دقائق ..ما بشوف.
الزول دا خلاص ..انتهي...شوتوا ارضا.
يا مهند ..ما تدي الزول دا فرصة عشان يقعد ينظر لينا.
شوت ليه ارضا ..كورة ما بثبتها



المواضيع المتشابهه:

رد مع اقتباس
إضافة رد


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة


Privacy Policy سياسة الخصوصية |

Sitemap

الساعة الآن 12:05 AM.


Powered by vBulletin™ Version 3.8.7
Copyright © 2018 vBulletin Solutions, Inc. All rights reserved.
SEO by vBSEO